Үйлчилгээний нөхцөл

1. Ерөнхий зүйл

Blindcare цаг захиалгын систем (booking.blindcare.mn)-ийг ашиглан цаг захиалснаар та эдгээр нөхцөлийг хүлээн зөвшөөрсөнд тооцогдоно. Систем нь Сэтгэл судлалын үндэсний төв болон системд бүртгэлтэй бусад сэтгэл зүйн төвүүдийн сэтгэл судлаачдын цагийг нэг дор үзүүлж, захиалга, төлбөрийг зохион байгуулдаг платформ юм.

Сэтгэл зүйн зөвлөгөөг сонгосон сэтгэл зүйн төвийн сэтгэл судлаач өөрөө үзүүлнэ. Blindcare нь платформ ажиллуулагч бөгөөд зөвлөгөөний мэргэжлийн агуулгыг хариуцдаггүй, харин захиалга, төлбөрийн системийг найдвартай ажиллуулахыг хариуцна.

2. Олон төв, сэтгэл судлаач сонгох

• Сэтгэл судлаач бүр нэг төвд харьяалагдана. Танхимын зөвлөгөө тухайн төвийн хаяг, зөвлөгөөний өрөөнд явагдана; төвийн хаягийг захиалгын алхам, баталгаажуулалтын имэйл, баримтад харуулна.
• Төв бүр өөрийн зөвлөгөөний өрөөтэй бөгөөд нэг өрөөнд хоёр танхимын зөвлөгөө зэрэг явагдахгүй. Тиймээс түрүүлж цаг авсан захиалга батлагдаж, тухайн өрөөнд давхцсан цаг бусдад боломжгүй болно. Онлайн зөвлөгөөнд өрөө шаардлагагүй.
• Үйлчилгээний төрөл, үнэ, сэтгэл судлаачийн ажлын цаг төв, сэтгэл судлаач бүрт өөр байж болно. Нийт төлбөрийг төлөхөөс өмнө захиалгын хуудсанд харуулна.

3. Цаг захиалах, баталгаажуулах

• Цаг сонгоод анкет бөглөсний дараа таны цаг төлбөр төлөх хүртэл түр хугацаанд хадгалагдана. Хугацаанд төлбөр төлөгдөөгүй бол цаг автоматаар чөлөөлөгдөж, захиалга хүчингүй болно.
• Захиалга төлбөр төлөгдсөнөөр баталгаажина. Баталгаажуулалтыг имэйлээр (имэйл хаяг оруулсан тохиолдолд) болон захиалгын амжилттай хуудсанд харуулна.
• Та утас, имэйл хаягаа үнэн зөв оруулах үүрэгтэй — бүх мэдээлэл, холбоос, сануулга энэ хаяг руу илгээгдэнэ.
• Давтан захиалга өмнө зөвлөгөө авч байсан сэтгэл судлаачтайгаа хийгдэнэ.

4. Төлбөр

• Төлбөрийг Minu төлбөрийн үйлчилгээгээр, банк эсвэл хэтэвчний аппаар QR уншуулж, эсвэл апп руу шууд орж гүйцэтгэнэ. Бид картын болон дансны нууц мэдээллийг хүлээн авахгүй.
• Үнэ нь сэтгэл судлаач бүрт тогтоогдсон бөгөөд ₮-өөр, НӨАТ-ийн хамт харагдана. Хүчинтэй промо код байвал хөнгөлөлт захиалгын дүнд тусна.
• Төлбөр хийгдсэн боловч системд бүртгэгдээгүй, эсвэл хугацаа хэтэрсний дараа төлөгдсөн тохиолдолд төвтэй холбогдож шийдвэрлүүлнэ.

Цуцлах, цаг өөрчлөх, төлбөр буцаах нөхцөлийг тухайн сэтгэл зүйн төв тогтооно. Захиалгаа цуцлах эсвэл цаг өөрчлөх бол уулзалтын цагаас өмнө төвтэй холбогдоно уу.

5. Онлайн зөвлөгөө

• Онлайн зөвлөгөө Google Meet-ээр явагдана. Уулзалтын өмнөх дэлгэрэнгүй анкетыг бөглөсний дараа Meet холбоос идэвхжиж, имэйлээр илгээгдэнэ.
• Google Meet апп-аа урьдчилан бэлдэж, чимээгүй, ганцаараа байх орчин сонгоно уу. Интернетийн хурд, төхөөрөмжийн асуудлаас болж зөвлөгөө тасалдсан тохиолдолд төв хариуцахгүй.
• Холбоосыг бусдад дамжуулахгүй.

6. Танхимын зөвлөгөө

• Товлосон цагаас 10 минутын өмнө төвийн хаягт ирж, хүлээлгийн өрөөнд бүртгүүлнэ үү.
• Хүүхэд, өсвөр насны зөвлөгөөнд эцэг эх эсвэл асран хамгаалагчийн хамт ирнэ.
• Төвийн дотоод журмыг дагана.

7. Үйлчлүүлэгчийн үүрэг

• Өөрийн болон хүүхдийн мэдээллийг үнэн зөв, бүрэн бөглөх.
• Зөвлөгөөний явцад дуу, дүрс бичлэг хийхгүй байх.
• Сэтгэл судлаач болон бусад хүмүүст хүндэтгэлтэй хандах; хууль бус, хэн нэгэнд хор хөнөөл учруулах зорилгоор системийг ашиглахгүй байх.
• Бусдын нэр, мэдээллээр хуурамч захиалга үүсгэхгүй байх.
• Системийн аюулгүй байдлыг тойрч гарах, хэт олон хүсэлт илгээх зэргээр үйлчилгээнд саад учруулахгүй байх.

8. Яаралтай тусламж

Энэ систем нь яаралтай тусламжийн үйлчилгээ биш. Амь нас, аюулгүй байдалд шууд заналхийлэл байвал яаралтай тусламжийн байгууллагад даруй хандана уу. Сэтгэл зүйн яаралтай дэмжлэг хэрэгтэй бол 108 эсвэл 1800-2000 дугаарт залгаж болно.

9. Хариуцлагын хязгаар

Сэтгэл зүйн зөвлөгөө нь дэмжлэг, мэргэжлийн зөвлөмж бөгөөд тодорхой үр дүнг баталгаажуулдаггүй, эмнэлгийн оношлогоо, эмчилгээг орлохгүй. Системийг тасралтгүй, алдаагүй ажиллуулахыг хичээх боловч техникийн саатал, гуравдагч этгээдийн үйлчилгээ (төлбөр, имэйл, Google) доголдсоноос үүдэх шууд бус хохирлыг хууль зөвшөөрсөн хэмжээнд хариуцахгүй.

10. Нууцлал, оюуны өмч

Таны хувийн мэдээллийг хэрхэн цуглуулж, ашиглаж, хамгаалахыг Нууцлалын бодлогод тайлбарласан. Системийн лого, дизайн, агуулга Blindcare болон Сэтгэл судлалын үндэсний төвийн өмч бөгөөд зөвшөөрөлгүйгээр хуулбарлах, түгээхийг хориглоно.

11. Нөхцөлд өөрчлөлт оруулах, хууль зүйн орчин

Эдгээр нөхцөлийг шинэчилж болох бөгөөд шинэчилсэн хувилбар энэ хуудсанд нийтлэгдэж, дээрх «Сүүлд шинэчилсэн» огноо өөрчлөгдөнө. Нөхцөлийн дагуу үүсэх харилцаанд Монгол Улсын хууль тогтоомж үйлчилнэ. Маргааныг эхлээд харилцан ярилцаж шийдвэрлэх бөгөөд шийдэгдээгүй бол Монгол Улсын хууль тогтоомжийн дагуу эрх бүхий байгууллага шийдвэрлэнэ.

Үйлчилгээ үзүүлэгч сэтгэл зүйн төвүүд

Таны захиалсан зөвлөгөөг дараах төвүүдийн нэг үзүүлнэ. Өөрийн мэдээллийн талаар асуух, хандах, засуулах, устгуулах хүсэлтийг тухайн төвд эсвэл Blindcare платформд гаргана.

• Сэтгэл судлалын үндэсний төвУлаанбаатар хот, Сүхбаатар дүүрэг, 8 хороо, River Castle Business apartment, b block, 409 тоот